काठमाडौँ । सरकारले बाघ गणना आउँदो पुसको पहिलो हप्ताबाट सुरु गर्ने भएको छ ।
राष्ट्रिय निकुञ्ज तथा वन्यजन्तु संरक्षण विभागका महानिर्देशक डा. बुद्धिसागर पौडेलका अनुसार बाघ गणनाका लागि आवश्यक तयारी पुरा हुने क्रम अन्तिम चरणमा पुगेको छ ।
बाघ गणनामा डब्लुडब्लुएफले ५० लाख, जेडएसएलले ७० लाख, एनटीएनसीले ५० लाख र अरु संस्थाबाट २५ लाख रुपियाँ आर्थिक सहयोग हुने प्रतिवद्धता
नेपालकथासँग कुरा गर्दै महानिर्देशक डा. पौडेले भने, फिल्डस्तरमा सबै तयारी करिब करिब पुरा भइसकेको छ । अब पुसको पहिलो हप्ताबाट चितवन पर्सा कलष्टरबाट बाघ गणनाको सुरुवात गर्ने तयारीमा हामी छौँ ।
फिल्डस्तरकोे तयारीको सम्बन्धमा विभागका बरिष्ठ इकोलोजिष्ट हरिभद्र आचार्य चितवन, पर्सा, बाँके, बर्दिया र शुक्लाफाँटा क्षेत्रमा निरीक्षण गरी राजधानी फर्किसकेका छन् ।
फिल्डबाट फर्केपछि बरिष्ठ इकोलोजिष्ट आचार्यले शुक्रबार नेपालकथासँग भने, फिल्डतिर आवश्यक तयारी भइरहेको छ । विशेष गरी क्यामरा व्यवस्थापनको काम विभागले सक्ने बित्तिकै बाघ गणनाको काम सुरु हुन्छ । हामी पुस १ गतेबाट गणनाको सुरु गर्ने तयारी गर्दैछौँ ।
बाघ गणनामा सरकारलाई डब्लुडब्लुएफ, जेडएसएल, एनटीएनसी लगायतका संरक्षण साझेदार संस्थाहरुले आर्थिक तथा प्राविधिक सहयोग दिने भएका छन् ।
सरकारसँग बाघ गणनाका लागि न्यूनतम रकम भए पनि यस पटकको बाघ गणनामा ठूलो आर्थिक सहयोग संरक्षण साझेदार संस्थाको रहेको विभागले जनाएको छ ।
बाघ गणनामा दुई करोड रुपियाँ भन्दा बढी लाग्ने अनुमान विभागले गरेको छ । बाघ गणनामा डब्लुडब्लुएफले ५० लाख, जेडएसएलले ७० लाख, एनटीएनसीले ५० लाख र अरु संस्थाबाट २५ लाख रुपियाँ आर्थिक सहयोग हुने प्रतिवद्धता व्यक्त भएको विभागले जनाएको छ ।
बाघ गणनाको काम कम्तिमा तीन महिनामा लाग्ने बताइएको छ । बाघ गणनामा करिब १२०० क्यामरा प्रयोग गरिने भएका छन् भने हात्तीको प्रयोग गर्ने योजना विभागले बनाएको छ ।
बाघ गणनामा निकुञ्ज तथा डिभिजनल वन कार्यालयको प्रत्यक्ष सहभागिता रहने भएको छ भने गणनामा दक्ष प्राविधिकलाई खटाइने भएको छ । बाघ गणनामा खटिने प्राविधिकहरुलाई आवश्यक तालिम तथा प्रशिक्षण दिइसकेको विभागले जनाएको छ ।
