काठमाडौँ । आज विश्व सिमसार दिवस । नेपालले पनि यो दिवस मनाएको छ । राष्ट्रिय निकुञ्ज तथा वन्यजन्तु संरक्षण विभागद्धारा आयोजना गरेको कार्यक्रममा प्रमुख अतिथि थिए, वन तथा वातावरण मन्त्री प्रेम आले अनि विशेष अतिथि थिए मन्त्रालयका सचिव डा. विश्वनाथ ओली ।
सदाझैँ यो वर्ष पनि सिमसार दिवसलाई विभागले औपचारिक कार्यक्रमको आयोजना गरी केही प्रकाशनको लोकार्पण गर्ने कार्य सम्पन्न भयो । सो कार्यक्रममा प्रमुख अतिथिको रुपमा बोल्दै मन्त्री आलेले इरानबाट सुरु भएको सिमसारको कथा कोट्याउदै भने, आदरणीय न्यायप्रेमी जनसमुदायमा सिमसार दिवशको शुभकामना । विश्वभर रहेका सबैलाई मन्त्रीको तर्फबाट शुभकामना दिन पाउँदा निकै खुसी लागेको छ ।
उनले भने, हिमालमा धेरै सिमसार रहेछन् अनि तल्तिर पहाडमा खासै सिमसार रहनेछन् तराईमा त ४० प्रतिशत सिमसार क्षेत्र रहेका छन् । यिनको संरक्षणका लागि मन्त्रालयले बजेटका व्यवस्था गर्नेछ । हामी त्यसका लागि लाग्ने छौँ ।
आफ्ना छोरा बिक्रम आलेको शुभबिबाहको काममा अलि व्यस्त देखिएका मन्त्री आलेले सिमसारको इरान शहरदेखि नेपालको हिमाल, पहाड र तराईसम्मको सिमसारको बजेट व्यवस्था गर्ने प्रतिवद्धता व्यक्त गरे । अन्तमा भने, मेरो पारिवारिक कामका कारणले म यहाँ धेरै समय बस्न सक्दिन । आज यहाँहरुले मलाई सिमसारका बारेमा धेरै कुरा सिकाउनुभयो, सिक्ने अवसर पाए ।
मन्त्री आलेका छोरा बिक्रमको माघ १६ गते बिबाह सम्पन्न भई २१ गते भोजभतेरको कार्यक्रम रहेको छ । सिमसारको कार्यक्रममा मन्त्रीका सचिवालयका कर्मचारीले मन्त्रीको छोराको भोजको निम्तो बाँड्ने अवसरका रुपमा लिएका थिए ।
सो कार्यक्रममा वन सचिव डा. विश्वनाथ ओलीले सिमसारको संरक्षणका विषयमा सान्दर्भिक र मननयोग्य मन्तव्य व्यक्त गरे । उनले भने, विगतदेखि नै नेपालले रामसार महासन्धीमा हस्ताक्षर गरेका कारण हामीले सिमसारको संरक्षण गर्नुपर्छ भन्दै आयौँ । के विश्व जगतका लागि मात्र हामीले सिमसारको संरक्षण गर्ने हो र ? सिमसारको संरक्षण त हामीले आफ्नै लागि गर्नुपर्छ भन्ने कुराको कहिले अनुभव गर्ने र हाम्रा सिमसारको संरक्षण हाम्रै लागि हो भनेर कहिले भन्ने ?
उनले भने, अब कुरा गरेर मात्र होइन, काम गरेर देखाउन सके मात्र नेपालका सिमसारको संरक्षण हुन सक्छ । नभए सिमसारको एकोहोरो दोहन हुँदै जाँदा भोलीको पुस्ता जोखिमका पर्न सम्भावा निश्चित छ ।
राष्ट्रपति चुरेबाट सरुवा भएर विभागको महानिर्देशक भएका डा. दिपक खरालले आफ्नो पहिलो औपचारिक कार्यक्रममा सिमसार संरक्षणका लागि विभाग भन्दा पनि एनटीएनसीको भूमिका बढी भएको तर्क प्रस्तुत गरे । उनले भने, हामी त सिमसार संरक्षणका लागि काम गरिरहेका छौँ । एनटीएनसी लगायतका संघसंस्थाका बढी भूमिका हुन्छ । हामीले ती संस्थाबाट बढी आशा पनि गरेका छौँ ।
उनले आफ्नो छोटो मन्तव्यमा कम्तिमा आधा दर्जन पटक एनटीएनसीको नाम उच्चारण गरे तर कार्यक्रममा संरक्षण साझेदार संस्था डब्लुडब्लुएफ, आइयूसिएन, जेडएसएल, बीसीएन लगायतका प्रतिनिधिको उपस्थिति पनि थियो । विभागसँग सो दिवस मनाउन सबै साझेदार संस्थाहरुले उत्तिकै सहयोग गरेका छन् भने सिमसार संरक्षणका लागि पनि सबै संरक्षण साझेदार संस्थाका कार्यक्रम रहेका छन् ।